「我們的(老餅)熱血回憶」 ─ 《電子神童》

今期熱血回憶,不加老餅兩個字,真的不行,《電子神童》原作漫畫由上世紀七十年代已經開始連載,動畫版在港播出是上世紀八十年代初,絕對老餅!這部誕生於七十年代「太空侵略者熱潮」的作品,可說是以打機作為題材的動漫先驅,比紅白機更早面世。

談起《電子神童》除了主角食野男石野嵐的大哨牙,除了太空侵略者,香港朋友一定會想起胡渭康主唱的主題曲「呀 呀 總要定  呀 呀 總要定 人同電腦邊個醒」,那年那代那孩子,有誰不懂這首歌?插曲「一股歪風」由當年還是新人的梅豔芳主題,歲月不留人,這位一代香港樂壇女王,離世已經有五年以上。

注意:內容有劇情!

 

《電子神童》(日原名:《ゲームセンターあらし》),為菅谷充原著的漫畫,由1978年至1983年連載,動畫版於1982年在日本首播,動畫版全套共二十六話,香港由無線電視於1984年在港首播,本作在日本收視平平,反而在香港引發熱潮,間接促成電子遊戲機中心在八十年代中的興起。

故事內容沒什麼特別,就是讀書糟糕的打機冠軍石野嵐不停被各路猛人挑機的故事。故事中玩的遊戲老餅到爆燈,除了今天仍時常經典復刻的打飛機遊戲「太空侵略者」或者「食鬼」,較常見的還有「馬莉勾佬兄弟」前身的大猩猩等等, 經歷過「GAME & WATCH」(八十年代初,老任出品的卡片形黑白液晶體遊戲機)年代的朋友,相信都很熟悉。

除了遊戲,大家印象最深刻一定是當中各種創意無限的「必殺技」,新一代朋友,相信很難猜到當年的動漫是如何天馬行空幻想力無限。當中必殺技的原理聽聽就好,認真深究恐防只有吐血。比較著名的必殺技,有以雙手高速回轉至擦出火花的「火炎陀螺」,磨擦雙手產生靜電干涉正常回路以做出異常反應的「電光飛沙走石」,為了穩定操作而以倒立式操控的「月光筋斗」(=鯉魚翻身),模仿瑜伽姿勢以集中精神的「水魚式」,還有「真空低氣壓」、「搖控門牙」(呆)等,在漫畫中,更有可以拯救人類的超必殺技「超新星」和集合兩位同伴使出的最終奧義「超新星三合一」,招招神怪,次次驚奇。

當然,普通打機比試,打不到十多本漫畫 ,二十多集動畫,所以劇中打機的場所有鬼屋有天空,漫畫版甚至打到回史前時代,跟恐龍決戰,要多誇張有多誇張。人物方面,除了石野嵐,主要登場還有他的對手兼朋友,頭腦很好的阿悟和大隻佬一平太,當然還有他的弟弟「東南風」。另外,他父母都是打機高手,看似一般師奶的媽媽更在比賽中,以幪面身份打敗石野嵐,算是全劇最驚爆劇情。

找不到動畫版回味,漫畫版也夠我邊看邊笑,瘋狂到失控的內容,雖然粗糙又荒謬,但充滿生命力,八九十年代的日本動漫會令我們懷念,很大程度,也是因為充滿朝氣的無限生命力。熱血回憶系列,我開了引言,還是想看看大家意見,就先說這麼多。

溫馨提示:因為MSB留言系統最近出現問題,大家留言最好先打在其他地方(如NOTEPAD),再COPY & PASTE,以免引起損失,另因系統問題,留言有可能會不作即時顯示,要數小時後才能看到,相信有關方面以作跟進,不便之處,敬請原諒。

28 thoughts on “「我們的(老餅)熱血回憶」 ─ 《電子神童》

  • 2009 年 12 月 16 日 at 10:40
    Permalink

    >> 磨擦雙手產生靜電干涉正常回路以做出異常反應的「電光飛沙走石」

    用啲咁o既招,唔會直接死機出局?

    Reply
    • 2009 年 12 月 16 日 at 22:40
      Permalink

      上世紀八十年代的漫畫,合理性大家不要深究了…

      Reply
  • 2009 年 12 月 16 日 at 11:01
    Permalink

    佢用哨牙打機, 真係好經典….

    當年好鍾意睇, 真係不得不認老餅!

    Reply
    • 2009 年 12 月 16 日 at 22:41
      Permalink

      識哩套野都好難唔認老餅,d招數真係好誇,今時今日都難以超越…

      Reply
  • 2009 年 12 月 16 日 at 13:04
    Permalink

    看題目, “電子神童”, 甚麽科幻片? 再看, 啊, 原來是這個! 當年TVB 首播, 我好像都看了不少, 印象已經很模糊, 但應該一輩子都會記得. 我並沒有因此劇開始打機, 因爲從來對打機沒甚麽興趣:)

    Reply
    • 2009 年 12 月 16 日 at 22:42
      Permalink

      哈哈,嚴明兄原來都睇過,哩套當年好受歡迎,唔打機都會睇,可能因為招數夠誇張…

      Reply
  • 2009 年 12 月 16 日 at 14:06
    Permalink

    超變態o既“門牙打機大法”,套用現今術語,真係可以用“睇到O哂咀”黎形容!之但係細個嗰時又真係會睇到眉飛色舞喎!嗰時真係有諗過點解自己無一棚咁樣o既門牙架!雖然係瘋狂咗啲!但係嗰時啲漫畫就真係創意十足囉!依家好難搵番呢一種情懷!

    Reply
    • 2009 年 12 月 16 日 at 22:43
      Permalink

      哩套野每一招都足以令人O嘴…

      而家睇番七,八十年代的日漫,好多意念喪過新書…時代係度退步?

      Reply
  • 2009 年 12 月 16 日 at 16:32
    Permalink

    葉一知 :
    佢用哨牙打機, 真係好經典….
    當年好鍾意睇, 真係不得不認老餅!

    心同感受!

    當年看只是覺得好精彩, 無在乎合理性, 但都會想, 那招火炎陀螺, 就是你隻手幾快都好, 但電腦設定去唔到都無用傢, 正如街機打高達咁, 元袓高達係咁快就咁快傢啦, 唔會你隻手行快些佢就會跟住去的……..^^

    細節唔記得傢啦, 但大致情節係記得好多[人老了], 可以用計數機玩的那個數字遊戲[唔記得叫乜]去追女仔…., 佢阿媽那段, 落地獄, 有個好似係忍者的, 破晒佢的必殺技, 之後佢去練成那招真空低氣壓返來打敗人, 到最後好似係咪同那個軍人打呀??那個軍人係用雙手打圈作龍捲風作招式的………

    想問網主那招超新星係點傢?

    Reply
    • 2009 年 12 月 16 日 at 22:46
      Permalink

      算吧…沒人會認真研究這類動漫的合理性的…總之咩都打得一爛餐,人狼,怪獸,吸血鬼…完全亂來

      超新星係咩招,入面都冇解說,只係話好勁好勁,使出時,只係用番鯉魚翻身姿勢,後面加個疑似宇宙大爆炸就算,勁馬虎

      Reply
  • 2009 年 12 月 16 日 at 17:15
    Permalink

    真係,最記得佢反地心力的絕招”鯉魚翻身”.死,影大你而家攪到我好想整套睇XD

    Reply
    • 2009 年 12 月 16 日 at 22:46
      Permalink

      動畫我都好想睇…但比較易搵只有漫畫版了…

      Reply
  • 2009 年 12 月 16 日 at 18:10
    Permalink

    印象最深除了主題曲, 還有主角阿媽的蒙面造型…. 其他野就唔記得了. 主角個細佬好似係打機天才的BB?

    Reply
    • 2009 年 12 月 16 日 at 22:47
      Permalink

      佢阿媽用個太空侵略者頭套…但點解重睇到路?

      佢細路東南風都係猛人…好似有超能力…

      Reply
  • 2009 年 12 月 17 日 at 02:17
    Permalink

    童年回憶, 豈會錯過!
    只是, 現在只幾主題曲及角色, 絕招名等, 劇情已不甚有印象了.

    既然開了熱血回憶, 不得不談及一些經典機械人動畫.

    宇宙大帝讓我愛上合體機械人. 黃金戰士讓我愛上思考科學. 大武士(太空基地)讓我喜歡鄧榮銾這位熱血配音員. 六神合體鞏固了我熱愛合體機械人的熱血情懷. 金毛獅王(太空保衛團)讓我知道麗的也有好片播映. 鐵人28教我改觀了它的初期笨重形象. 電腦戰士反映了什麼是醜陋機械人. 變形金剛令人目不暇給. 天威勇士和百變雄師原出一系. 光速電神教曉我希臘的頭三個字母. 百獸王讓我認識到楊仲恩, 徐小明等一系列亞視動畫歌手. 機甲艦隊十五機的華麗合體導致到要集集留守電視旁邊. 星空鐵衛讓我知道三色台播了不少外國版的日本機械人動畫. 數著數著….還是早點睡睡, 後會有期.

    Reply
    • 2009 年 12 月 19 日 at 22:12
      Permalink

      哈哈,搵期專講下機械人動畫先得…話說,好多老作,本家都有介紹過了

      Reply
  • 2009 年 12 月 17 日 at 09:15
    Permalink

    我相信看過這動畫的小朋友, 都有偷偷地試過用牙打機吧~~~ 哈哈!!

    對這套動畫印象不太深刻, 除了超變態的打機方法, 就只有”幪面媽媽”這個對手了…

    Reply
    • 2009 年 12 月 19 日 at 22:13
      Permalink

      我…其實,未試過…因為紅白機個十字掣好難用牙咬(笑)

      大家都記得當中的變態絕招…充份証明那些招式有多恐怖…

      Reply
    • 2009 年 12 月 19 日 at 22:14
      Permalink

      以你咁年輕,應該唔會太記得架啦(笑)

      Reply
  • 2009 年 12 月 18 日 at 22:23
    Permalink

    我祇係看過電視動畫版,無看過漫畫版。

    記得除了經常玩太空侵略者之外,有些時候都會玩青蛙過河!

    男主角棚牙真係經典,用來咬緊操控器打機咁都得,真係:

    點到你唔服?^_^

    Reply
    • 2009 年 12 月 19 日 at 22:16
      Permalink

      真係,成日都玩青蛙過河

      哩套D絕招太喪,所以至今仍未有同類可以超越,咪話佢唔勁…

      Reply
  • 2009 年 12 月 21 日 at 13:46
    Permalink

    認識瑜伽, 都係因為佢!
    以為瑜伽就係得一招!
    以為做得瑜伽多, 就會識飛!
    到現在做得最好既柔軟體操就係鯉魚翻身!
    極度欣賞有哨牙既同學!但有哨牙又唔等於打機叻…
    跟人入機鋪後發現無論你幾大力拍個波棍, 佢最多彈兩下, 控製果部”凸”九成九唔郁, 同埋會比人鬧!
    見到比煙頭辣到溶溶地既制, 絕無勇氣用牙試佢…

    Reply
    • 2009 年 12 月 21 日 at 21:19
      Permalink

      如果好似佢咁打機,肯定係機鋪被阿叔趕出門口…

      以香港機鋪的衛生情況,用手都有點怕,別說用牙了(苦笑)

      Reply
    • 2010 年 01 月 14 日 at 22:39
      Permalink

      模型神童三四郎之前介紹過,不過只係漫畫版,有機會都會寫動畫版,但題目太多…不知何年何月才有機會…

      我D題目多到…全職寫都應該寫唔完…ORL

      Reply
  • 2011 年 07 月 25 日 at 16:21
    Permalink

    我都係70後,今日啱啱同啲80後傾開呢套片,最記得有一集,石野嵐點打都打唔羸對手,但對手根本實力無可能贏倒佢,最後原來係兩台遊戲機駁錯線,佢點努力都係打緊對手果局。可憐。

    Reply
  • 2018 年 11 月 05 日 at 08:45
    Permalink

    這篇文章應是09年的吧,最后留言是11年.小弟是70后 印象没有未來警察咁强 估吾到9年后 终於有石野嵐玩具出現

    Reply

發佈留言

發佈留言必須填寫的電子郵件地址不會公開。